YMA GEN. CONFERENCE VAWI-70 NA THLENNA TUR BAIRABI KHAW CHANCHIN TLANGPUI

By Kima Bawihtlung

Zoram chhung leh pawna YMA member zawng zawng te Zampuimanga Group YMA hmingin chibai kan buk a che u.

BAIRABI KHAW DINHMUN LEH A AWMNA HMUN: 

Bairabi hi kum 1928 ah din tan a ni a, ram ngaw chhah tha tak takin a hual vel, tlang leh tlang inkar hmun rem taka awm a ni. Kolasib atanga hmar thlang lam KM-30 vel, Assam leh Mizoram inrinna laia awm niin NH-154 paltlang khua a ni a, Tlawng lui kânin chhim chhak lamah Mamit District leh khawthlang lamah Zawlnuam panna kawng tha takin a pawh a ni. Kum 1966 ah khan Bairabi chhehvela awm khaw dangte nen Bairabi-ah hian sawikhawm (Grouping) kan ni.

Tin, Bairabi khua hi Village Council pahnihin awpin, 2013-a Village Council-ten survey an neih atanga a lan danin Bairabi ah hian In 1081 bawr vel awmin chhungkaw 1170 an khawsa a. Mipa 3505 leh Hmeichhia 3557 niin mihring cheng zat hi 7062 bawr vel ni a hriat a ni.

Bairabi khaw chhung hi KM-2 aia thui hret a ni a, kawngpui dung zawh lova ram rai tha taka inzarpharh kan ni a, hei vang hian khawchhung khawi lai hmun pawh hi hla lo te leh awlsam taka inkalpawh zung zung theih a ni. Mizorama inkalpawhna kawngpui tha ber ni thei dinhmunah kan ding mek a, sorkar-in chak taka a lak chuan kalkawngah harsatna a awm lo tura ngaih a ni.

YMA DINHMUN : Bairabi ah hian YMA hi kum 1947 khan din tan a ni a, tunah hian Branch pahnih awmin Section panga ah inthen a ni. Tin, Branch pahnihte khaikhawm turin Joint YMA a ding bawk. YMA member hi 1000 vel kan awm mek a ni.

SORKAR OFFICE DINHMUN : Bairabi khua hi Sub-Deputy Commissioner in a thut a, Power & Electricity Department (P&E) leh Public Works Department (P.W.D) te hi Sub-Division a ni a, Primary Health Centre awmin AH&Vety Department hi Vety. Officer in a thut mek bawk. Environment & Forest Department hi Range Officer in a thut a, Agriculture Department hi Circle Officer-in thutin, Police Department hi Inspector-in a thut bawk a, Public Health Engineering (P.H.E) hi Site Office niin Junior Engineer in a awp mek bawk a ni. Zirna lamah hian Primary School atanga High School thleng neiin School 13 a awm bawk.

SORKAR HMUN PAWIMAWH TE : Bairabi hi Mizorama Rel (Train) luhna awm chhun a ni a. Dt 16.3.1991 khan Bairabi-ah rel lo lut tanin tun thleng hian khualzin phur bakah Mizoram ei leh bar phur luhna tangkai tak a ni a, tunah tak hi chuan Bairabi to Sairang rel kawng kal tur leh, rel lian kawng siam mek a nih avangin 2014 March thla tawp atang khan Bairabi-ah hian rel a la rawn lut leh hrih lo/

Rel Station bul lawkah hian Dt 7.5.2004-a hawn Thermal Power Plant 22.92 MW pe chhuak thei tura duan a awm a. Tin, Thermal Power Plant piah lawkah hian Food Corporation of India (FCI) Godown lian tak tak pahnih awmin Rel atanga Buhfai leh eitur dang phai lama atanga Mizoramin a lakluh chu FCI Godown-ah hian chhek khawmin heta tang hian Mizoram hmun hrang hrangah Motor lian (Truck) hmanga phurhchhuah zut zut reng a ni.

Tin, Mizorama lui sei ber Tlawng; Suarpui Hydel Project avanga hmingthang tak kha Bairabi khaw bul maiah a luang dul dul a, Tlawng kamah hian mi tam takin thlai huan siamin eizawnnan an hmang mek a ni. Tlawng kam hi hmun rem leh nuam tak tak a ni a, inbualna leh picnic-na hmun remchang tak tak pawh a awm.

Inbiakpawhna lamah Airtel, BSNL, Vodafone leh Aircel Service Provider te a awm a, Airtel 3G hman theih a ni.

SHARE →

Tweet

FOLLOW US →

SHARE RAWH →